Zeedel 2011

Fasnacht 2011

Generation Sauhund

Vor fuffzig Joor isch unser Basel 

E suuberi Stadt gsi das isch kai Gfasel 

D Strosse clean und nit verdräggt 

S Stadtbild scheen jo fascht wie gschläggt 

Eso het sich Basel presentiert 

Und me het sich nit geniert 

Z saage: jo ich bi vo doo 

Und ich bi stolz druff es isch esoo. 

Die glainschte Gnäggis hän s scho gleert 

Dass Abfall in e Kiibel gheert. 

Doodrfir sin die au do 

Und nit zem numme ummestoh.

 

Spaziersch emool hit durch unseri Stadt 

isch dä Spaziergang nim wirgglig gladd 

Willsch in d Freie Stroos go Klaider kaufe 

Muesch regelrächt e Slalom laufe 

Zem nit in ebbis yynestoo 

Wo e Hundeli het liige loo. 

Die Hyffeli uffnäh wär nit schwäär 

und die griene Käschte nit so läär. 

Bim Globus unde merksch konschterniert 

Bisch mit eme Kätschgi kollidiert. 

Das glääbrige, gruusige Zyyg wo si schmatze 

Deerfsch jetzt vo dyne Sohle gratze.

 

Es isch schlimm, dass in dr hittyge Zyt 

Ganz vyyl – maischtens jungi – Lyt 

Wo si steen und wo si geen 

dr Abfall ummeliige leen. 

Pizzaschachtle, Biggse, Fläsche 

Zigarette, Yykaufsdäsche 

Und dängge was sell s, dä ganzi Drägg 

Mache anderi scho wider ewägg. 

Mänggi Ort kennt me ohni z iberdryybe 

Als rainschti Abfallhalde beschryybe.

 

Kulturstadt Basel – o jeeminee 

Wänn das Tourischte wirgglig gsee? 

Kenne mir no stolz druff syy 

Uff unseri Stadt am scheene Rhy?

 

Isch es mangelnde Reschpäggt 

Dass Basel als wie mehr verdräggt 

Isch s Gedanggelosigkait 

Oder schlicht Beguämligkait? 

Het me s als glai Kind nit gleehrt 

Dass Abfall nit uff d Stroose gheert?

 

Im allgemaine muesch konschtatiere 

S macht Angscht wo duet das aanefiehre? 

Wo stehn mir in fuffzig Johr 

Bestoht doo nit die grossi Gfoohr 

Dass unseri Stadt im Drägg versinggt 

Und dr Stroosewischer singt:

 

Jä wisch dr Drägg ewägg ewägg ewägg ewägg 

Alli mache hit e Riisegschrey 

Ab dääre grosse Sauerey 

Bim Littering-Buesse-Kataloog 

Stellt sich aber ai grossi Froog 

Isch doo drmit e Leesig in Sicht? 

„wohl eher nicht“

 

Aber: E jeede vo uns het emool gleehrt 

Dass Abfall in e Kiibel gheert. 

Halte mir uns numme ganz aifach draa 

Und mir mien kai Angscht vor dr Zuekunft ha.