Zeedel 2010

Fasnacht 2010

S Gryyse-Raad

Es gryyselet es gryyselet 

es goht e ruuche Wind

Dr aint dä steggt dr Kopf in Sand 

dr ander lauft ganz gschwind

Im Radio, Färnseh und dr Zyttig

Wirdsch iberschwemmt – 

de luegsch ganz gyttig

Was alles in dr Wält bassiert

De bisch verruggt und bisch fruschtriert

Denn was sich gwissy doo erlaube

Isch himmeldruurig – me mag s kuum glaube.


Dr Muhamar, dä armi Maa

Lyydet fesch me gseht em s aa

Sy aige Flaisch und Bluet im Knascht!

Eso gseh duurt dä aim jo fascht

Luegsch aber e bitz genauer aane

Het är s verdient jo nundefaane

Dr Papi het e anderi Mainig

Do isch sich d Schwyz und är nit ainig

Dr Merz macht dr Canossa-Gang

Und hofft dass iber kurz oder lang

Das Middeli au funggzioniert

Do het är sich ganz bees trompiert

Es gryyselet es gryyselet 

im Bundeshuus in Bärn

Und me het dr glaini Merz 

uff aimool nimm so gärn.


Dä armi Dropf kunnt kuum zer Rueh

Är het jo no mit de Bangge z due

Au die sin zer Zyt in ere beese Gryyse

Git s e Leesig? S wird sich wyyse

Das kunnt drvoo – lätz inveschdiert

In Amerika verspegguliert

Kai Wunder saage d Kunde Bye Bye

Vyyl sicherer isch my Gäld dehai

Es gryyselet es gryyselet 

bi de Schwyzer Bangge

Hauptsach isch die grosse Dier 

kenne gniegend tangge

Die saage ohni e schlächt Gwisse

unseri Boni die wänn mir nit misse


Au dääne arme Granggekasse

Fäält s an Gäld und zwoor in Masse

D Bräämie sin am eggsblodiere

Grangg sy duet sich nimm rendiere

Wenn s Di verwitscht het gang go penne

Muesch doch nit grad zem Doggder renne

E Ziibeleumschlaag gääge dr Bälli

Kamilletee bim beleggde Lälli

Hesch Fieber hilft e Essigwiggel

oder Bouillon vomene Huehn oder Giggel.

E jeede kaa dur sy Verhalte

Hälfe d Keschte niidrig z halte

Es nyyselet es gryyselet es goht e kalte Wind

Maitli, leeget d Händsche aa – 

Buebe laufet gschwind.


In Koopehaage z Däänemargg

Macht sich e mängge Staatsmaa stargg

Am Klimagipfel heersch se schnuure

Und me froogt sich naymeduure

Wie isch me an dää Punggt do koo

Het me z weenig gää und vyyl z vyyl gnoo?

Es ka nit syy dass d Gletscher schwinde

Und d Bääre am Pool kai Yys me finde

Wenn jetzt nit e jeede insyschdiert

Umdänggt, sich anderscht brogrammiert

Bestoht die Gfoor dass unseri Ärde

Kollabiert und alles zue Staub duet wärde

Es gryyselt an allne Egge

S nutzt nyt dr Kopf in Sand go stegge


Es git immer und iberall dausig Sache

Wo e jeede vo uns besser kennt mache

Ihr liebe Bonze dängget draa

Dass alles Gäld nyt hälfe kaa

Wenn s in Bentley inveschtiert isch

In dyyri Fraue oder Koi-Fisch

Machet ebbis gscheiters drmit

Damit s unsri Ärde no langi Zyt git.