Zeedel 2009

Fasnacht 2009

Mir sin sicher - Und du?

Wär sicher mecht dur s Lääbe wandle

Dä miesst au dämentsprächend handle

Und alles was aim gfehrlig dunggt

Eliminiere – das isch dr Punggt.

Sicherhait isch s A und s O

Eso sett s sy es isch eso.

Hoggsch in s Auto isch scho glaar

„wer Auto fährt ischt in Gefahr“

Dr Gurt schnäll um e Ranze gschlaage

Är druggt aim gruusig uff e Maage

Dr Abstandsmälder aggdywiere

Duet äggscht dr Airbag funggzioniere?

Alles „Rodscher“ me ka starte

Bis zer Ambble – deert kasch warte.

Worum - das ka e kaine saage

Es kunnt kai Mensch, kai Deff, kai Waage

Was sell s was willsch es isch eso

Wenn s sicher isch sin alli froh.

Es liggt denn nimm in Dynere Macht

Wenn Ain unbrämst in Di yyne gracht

Und sait är haig – herrjeminee –

Das rote Liecht gladd ibersee.


Fliegsch in d Ferie mit Dym Schatz

Verlangsch bim Notuusgang e Blatz

Und loosisch mega konzentriert

Wenn vorne e Gumsle, lyycht affegtiert

S Notfallprozedere duurefiert

Und d Suurstoffmasgge demonschtriert.

Fir e Wasser-Crash jo do git s Weschte

Numme wär drby zem teschte

Wie die aim könnte vor Hai beschitze

S isch frooglig dass die in däm Fall nitze.

By dääne Gedangge iber meegligi Gfoore

Blyybsch gschyyder dehaim die näggschte Joore.


Jeedes Joor zer Gribbezyt

Rennscht zem Doggder gar nayt wyt

Es isch jo numme umme n Egge

Und loosch Dir d Noodle yynestegge

Jetzt schnäll haim, nit ummschwanze

Und ains, zwai drei liggsch uff em Ranze

Die schlächti Noochricht: 3 brocheni Ribbe

Die gueti: garantiert kai Gribbe.


Gohsch in e Laade ebbis go kaufe

Wie sicher bisch, was die Dir verkaufe?

Sin’s Giggel us Usbekischtan, Sai vo de Mongoole

Aier us Tadschikistan oder Kääs diräggt us Poole?

Die Ursprungslanddegglarazion

Isch definitiv dr greeschti Hohn

Si mache drum e Riise-Wääse

Nur s dumme isch: de kasch s nit lääse

So munggelig und winzig glai

Bruuchti s e Lupe und die isch dehai.

Zem all die Gfoore z eliminiere

Deerftisch numme no Keerner inhaliere.


Im Zolli drenne si - s isch ganz apart

Dr Lai vom Wildhung uff nadyyrligi Art

E Wassergraabe wurdi s bringe

Dass kain in s Revier vom andre wurd dringe.

Dr Wildhund isch in s Wasser gheyt

Das Experimänt isch abverheyt.


Alli Gfoore z eliminiere

Isch unmeeglig und me muess konschtatiere

Dass immer ebbis bassiere kaa 

Au wemme allem Aaschyyn aa 

Alli Vorsicht het walte loo

S ganze Lääbe lauft eso.