Zeedel 2008

Fasnacht 2008

DR VAM“BIER“FLUECH

2008 was fir e Joor

D Fuessball Euro stoht bevor

Loht e kaine kalt im Land

Underem Motto mitenand

Feschte, hoffe, Duume drugge

Wenn s druff aakunnt zämmerugge

Und wär waiss wenn s guet isch gloffe

Am Änd sogar uff s Wunder vo Wien kenne hoffe.

Bis es sowyt isch, d Zyt isch nit gnabb

Fliess no vyyl Wasser dr Rhy durab

Zerscht haisst s emool vyyl organisiere

Duuredängge, informiere

Iber dr neyschti Stand parliere¨

Und au immer wider blagiere

Dass alles glabbt und alles gliggt

Und d Schwyz im Euro-Faarblaan liggt.

Alli rischte sich fir s Fescht

D Nati absolviert no Tescht

Unseri Schugger gehn zue de Schwoobe

Ins Lager zem dr Ärnschtfall broobe

Hotel wärde us em Boode gschtampft

Und iberall wird schambaar grampft.

Feriestopp fir d Drämmler z Basel

Damit dr Faarblaan das isch kai Gfasel

In dääre Zyt au funggzioniert

Und dr Verkehr nit kollabiert.

Hesch Zyt und Luscht und bisch nit stier

So mäld Di doch als Volunteer

Dä Job isch ebbis fir Mamme und Babbe

Und s Bescht isch: de verdiensch kai Rabbe.

Alli saage - au Tochter und Sohn -

Drbyy syy isch dr scheenschti Lohn.

D Baizer ryybe sich scho d Händ

Si wisse scho dass ganz am Änd

Fir si e scheene Batze lacht

Und alli Mieh sich zahlt het gmacht.

Wär zahlt, befiehlt - es isch esoo

D Sponsoore hän s saage he nu drnoo

Die schyyse s Gäld und schryybe vor

Was usgschänggt wird und dr Tenor

Vo de Konsumänte und de Wirt

Isch frindlig gsait e bitz verwirrt.

Bisch im Stadion oder als Fan

Im grosse Public Viewing-Clan

Muesch uf e Siig vo de Schwyzer, de grosse

Mit eme Dänische Bier aastoose.

Das isch doch genau so blööd

Wie e Morgestraich mit Smörebröd.

Syg’s wie s well do muess me duure

S nitzt nyt au kai dummi Schnuure

Muesch in dä suur Epfel bysse

Au wenn s Di fascht duet verrysse.

Zem guete Gligg kasch wenn dehaim bisch

Vor dr Glotze und an dym Disch

Dä Hopfe dringge wo Dir basst

S git e mängge guete Gärschtesaft.

Wär zahlt, befiehlt - es isch esoo

D Sponsoore hän s saage he nu drnoo.

D Waage- und Reggwisyte-Usstellig isch am Mändig, 

11. Hornig und am Zyschdig, 12. Hornig uff em Kasärneareal.

www.schindgrabe-clique.ch