Zeedel 2007

Fasnacht 2007

SchLachTbrätt

E diefi Frindschaft kasch s kuum nenne

Zvyyl duet die Baide nämlig drenne

Geographysch isch das s Riebliland

Zem guete Gligg - s wär allerhand

Wurdisch s Baselbiet verloo

Und bletzlig im Kanton Ziry stoo.

Me froggt sich aber scho wyso

Isch das zwische Basler und Zircher eso

dä Läggerligraabe muess dä syy

zwische dr Limmat und em Rhy?

A propos Läggerli me kennt gryyne

Ziehn sich jetze d Ziircher yyne

Mir finde s isch e Riiseschand

Die sin jo jetzt in Blocherhand

Es isch bezaichnend und symptomatisch

E Zircher isch halt nit sympatisch.

Jetzt spiile mir imaginäär

E Partie Schach das isch nit schwäär

Und luege speeter ganz zem Schluss

Wäreliwär isch denne duss.

Dr wyssi Buur zieht uff e4

Dr schwarzi uff c6

E Byschbyyl: unsre Mässedurm

In dr Bar Rouge wird s dr ganz sturm

Hundertfimf Meter iberem Boode

Dringgsch dy Gypli amme zoobe

D Zircher saage das ka me toppe

Und baue zem lääbe und zem shoppe

In Ziry Wescht e Hochhuus aane

Hundertsäggsezwanzig Meter nundefaane

Wartet s ab dasch nonig gässe

Iir deerfet d Basler nit vergässe

Fir d Euro 08 isch ebbis im Due

Hundertsächzig Meter: dä Sagg isch zue.

Die Zwängi uss dr Zwinglistadt

Finde uns scho lang nimm gladd.

Dr wyssi Buur zieht uff d4

Dr schwarzi uff d 5

Synerzyt bi dr Swissairplaite

Hän mir is vo Zircher lo verlaite

Uff d Crossair, unsere Stolz, z verzichte

Die bringe s jo fertig alles z vernichte

Und denn s Theater und Riisegschyss

Um dr neyi Standort Swiss

S isch nit mehr als rächt mir saage s doo

Het Basel denne dr Zueschlag bikoo.

Dr Springer landet uff c3

Dr Buur goht uff e4

Mir kennte jo au afoo motze

Es isch zem hyyle und zem bräche

D UBS kehrt uns dr Rugge

Duet sich still und haimlig verdrugge

Und findet s nätter als am Rhy aa

Bi dr Zircher Schickeria

wysse Springer uff e4

schwarze uff d7

Als Fuessballfan do bisch e Arme

Kai Schugger het mit Dir Erbarme

Anstatt in Ziry Hauptbahnhof City

Landisch gladd in Altstätte Mitti

Doodrfir wärde an de Mätch in Basel

Loosed guet zue das isch kai Gfasel

Gschänggli vo de Schugger gmacht

Gummi fir Alli – jo denn guet Nacht.

Wyssi Dame uff e2

Springer uff f6

Uff Eych verzichte wämmer nit

Au wenn s mänggmool Lämbbe git

Liebi Zircher blyybet uns erhalte

Iir sind die beschte Sujetliferante

Wysse Springer uff d6

Doodrmit isch schwarz Schachmatt

Aadie Zircher und händ s no gladd.

D Waage- und Reggwisyte-Usstellig isch am Mändig,

26. Hornig und am Zyschdig, 27. Hornig uff em Kasärneareal.

www.schindgrabe-clique.ch