Zeedel 2006

Fasnacht 2006

Mir fyyle n ys veroschplet

Es isch so scheen e Bebbi z’syy

In dääre tolle Stadt am Rhy

E Stadt wie Basel git’s kai zwaiti

Vom Santihans bis zue dr Braiti

Vom Gellert bis zem Bruederholz

Isch e jeede driber stolz

E Dail vo Basel deerfe z’syy

Dääre scheene Stadt am Rhy.

Wenn im Jänner, das isch kai Gfasel

Am Eeredaag vom mindere Basel

Dr Leu, Wild Maa und Gryff dien danze

Denn waisch im Grosse und im Ganze

Goht’s nimm so lang, s isch bald sowyt

D Fasnacht ruggt – die scheenschti Zyt.

Wenn s am Mändig vieri schloot

Und Aine äng bim Andere stoot

Denn spyyrt’s e Jeede wie s en paggt

Und s Härz glopft fescht im Bebbi-Taggt.

Das Zauberwort haisst Mitenand

Egal wie alt, vo wellem Stand

Eb Maa, eb Frau, eb arm, eb ryych

In däm Momänt sin alli glyych.

Ganz ähnlig isch’s me ka’s guet gsee

Im Joggeli, bim FCB

Zämme juuble, zämme hyyle

Sich ab und zue ganz hilfloos fyyle

Zämme gumbbe, zämme lache

Und am Änd La Ola mache.

Und lauft’s emool nit wie me dänggt

Well dr FCB e Siig verschänggt

Denn isch’s esoo – was willsch do mache

Eso goot’s mit ganz vyyle Sache.

Liecht und Schatte sin nooch zämme

Do muess sich e kaine schämme.

S ka doch nit immer d Sunne schyyne

S muess au emool dr Himmel gryyne

E jeede het Rächt aber au Pflichte

Anderscht kennt me s gar nit richte

Dass e Stadt wie Basel funggzioniert

Bruucht s e jeede wo sich engagiert.

Und z gueter Letscht all Joor -  persee

Styyre zahlt es duet scho wee.

Gyz isch gail – o himmlischi Sphääre

Anderscht ka me s nit erklääre

Dass gwissi ruggsichtsloosi Herre

Basel dien dr Rugge keere

Und haue ab ohni Skrupel, persee

Nach Wollerau an Zirysee

Verdiene sich wyter e goldigi Nase

In dr Schwyzer Styyroase.

Gnau die sin s mit dr grosse Schnuure

Wo sich z Basel s ganz Joor duure

Im beschte Liecht in Szene setze

Zfriide iire Schnabel wetze

Vom Basler Image profitiere

Sich an dr Fasnacht profiliere

Wettbewärb in’s Lääbe riefe

Wo sich Bängg im –tis leen briefe

Sich d Rosyynli uss em Kueche

Syyferli dien uusesueche

Bi jeedere Gläägehait verkinde

Ich bi Ain vo Eych, iir liebe Frinde.

Und wenn s an s Lääbige goht die Gleen

Uff aimool nimm drhinter steen.

Es deent wie Hohn und obergsteert

Wie ka das syy - s isch unerheert

Dass die wo sich sälber uff dr Olymp dien stelle

Ohni sich z schämme e so n e Mischt verzelle.

Als Bebbi sett me stolz druff syy

In dääre Stadt am scheene Rhy

Daagyy, daaguus, Jooruss, Jooryy

In Basel deerfe dehaime z syy.

Drum git s jetz wie nit anderscht z erwarte

vo uns, Herr Ospel, die roti Karte.

D Waage- und Reggwisyte-Usstellig isch am Mändig,

6. Merze und am Zyschdig, 7. Merze uff em Kasärneareal.