Zeedel 2004

Fasnacht 2004

Rhy-Butzete

Z Basel an mym Rhy

Jo deert mecht i sy

Waait nit d Luft so mild und lau

Und dr Himmel isch so blau

Z Basel, z Basel, z Basel an mym Rhy.

E jeedes Kind ka s intoniere

Und wenn de s heersch duet s di grad friehre

E Hommage isch s an unsri Stadt

Wo voll vo Lääbe isch und glatt.

Wirgglig vyyl wird z Basel botte

Und d Kultur wird nie verrotte

Kai Kinschtler muess sich do verstegge

Und so gseesch an alle Egge

Zem Byschbyyl Littmaa-Boodebilder

(schwyyge isch Gold-reede isch Silber)

Verpaggti Baim vom Christo samt Frau

E Minschter-Ängel-Zimmer gseesch au

Advänts-Kaländer-riisegross

Deert oobe an dr Freie Stroos

Balle uff jeedi Wyys und Art

Uns Basler blybt au nyt erspaart.

Zem Dail isch s guet – zem Dail isch s schlächt

Doch was isch falsch und was isch rächt

Doo isch me sich halt nie so ainig

E jeede het sy aigni Mainig

Heggschtens bi däm Pissoir

Bim Theate isch ganz klaar

Wär s e Sääge – s wurdi gschprängt

Oder grad im Rhy versängt

S wurd allerdings nur denne nutze

Wenn si dr Rhy nimm wurde butze.

Z Basel in mym Rhy

Gseeht s himmeldruurig dry

Deert kasch wirgglig alles finde

Vom Deffli bis zer Zimmerlinde

Vom Herre-Velo bis zem Sofa

Vom Kinderwaage bis zem Mofa

Alles wird eliminiert

Und unserem Babbe Ryh zuegfiehrt

Jo, doo ka me sich scho frooge

Und Gedangge dien aim blooge

Sin mir denne scho so wyt

Isch s dr Lauf vo dääre Zyt

Ass das wo hit vo grosser Bedyttig

Morn eso „out“ isch wie die geschtrigi Zyttig?

E Byschbyyl gfällig? Wie s Eych bliebt!

E jeede Basler het en gliebt

E jeede het sy Naame kennt

Isch gstresst under ihm duuregrennt

Oder het bi ihm verwyylt

Und sich mit ihm verbunde gfyylt.

Är het zue Basel gheert und gfalle

Dr Luminator in dr Schalterhalle.

Zerscht abserviert ins Schwoobeland

Das elai isch jo scho allerhand

Denn zrugg in Basel – ganz ewägg

Mit dr Begrindig: kai Verwändigszwägg.

E jeede Mischt muesch akzeptiere

Jeede Saich still toleriere

Sogenannti Kunscht erdulde

(vyyl gheerti grad in d Abfallmulde)

Z Basel an mym Rhy

S kennt vyyl scheener sy

Wurd nit was me wirgglig liebt

Kalt und gfyyllos abserviert

Z Basel, z Basel z Basel an mym Rhy

D’Waage- und Reggwisyte-Usstellig isch am

Mändig, 1. Meerze und am Zyschdig, 2. Meerze

uff em Kasärneareal