Zeedel 2002

Fasnacht 2002

Dr Grossi Jokair-Poker

Am Balsbärg duesch linggs iibereschiile

Deert gseesch vier Type Karte spiile

Oobe am Disch droont dr Mister Bouw

Dr neyi Schwyzer-Airline-Pfau

Vis-a-vis mit dr digge Davidoff

Dr Moritz Suter, sympathisch schroff

Zue synere Rächte mit verhaltenem Muet

Hoggt observierend dr Rainer Guet

Zer Komplettierig vo däm Airline-Goschbel

Singt im Chor no dr Marcel Ospel

Hit goot kain vo dääne uff d’Gass

Nai me spiilt dr “Airline-Jass”

S foot happig aa, es isch nit glooge

Dr Guet will verdaile, ooni z’frooge

Dr fluugerbrobti Niiderländer

Interveniert: verdeggel was wänder

He Rainer was Du machsch isch Shit

E so n e Spiil das spiil i nit

Dr Moritz isch fir Leesli zieh

Do maint dr Guet: das mach i nie

Dr Ospel revoluzzt: das isch e Schand

Und dr Bouw: s’cheet zuu wie am laufenden Band

Wo d’Rundi no am schnuure isch

Leggt dr Guet s’Spiil uff e Disch

Dr Niiderländer, scho imene glaine Suff

Nimmt als erschte d’Kaarte uff

Immer no am Stumpe kätsche

Isch dr Moritz mit em Ospel am rätsche

Do sait dr Marcel: willsch no lang zuewarte

Jetzt nimm doch ändlig dyni Karte

Waisch Ospeli wie mir das stinggt

Au ich wais doch: das Spiil isch zinggt

Kryz isch Drumpf, ich spiil dr Buur

Seesch i ha’s gwisst! sait dr Moritz stuur

S’Spiil isch lanciert, kain muess mee warte

Jetzt fliege uff em Disch die Karte

Si fliege, und das z’gseeh isch wichtig

Alli in die glyychi Richtig

Dr Peter Bouw, no ain am suffe

Verschwindet hinter sym Kartehuffe

Do will dr Moritz e Drimpfli stäche

Maint dr Guet „das isch e Fräche“

Dä Crossair-Guru isch oberstuur

Do bring ich grad nomol Drumpf-Buur

Das wär jo glacht am Morgestraich

Au dä bikemme mir no waich

Drotz de allerbeschte Karte

Muess dä armi Siech no warte

Är maint die Karte syg e Bogg

Doch verfäält, jetzt kunnt dr Schogg

D’Bögg sin doch gspiilt, die allerbeschte

Do rutscht no aine us ere Weschte

Wär hett en aa dä Zauberhuet?

Es macht dr Aaschyyn s’isch dr Guet

Eb Drumpf, eb Näll, eb s beschte Ass

E soone Jass - dä macht kai Spass

Do kenntsch die diggschte Karte haa

Si sueche nid dr beschti Maa

Es isch ganz klaar, hit an däm Disch

Kunnt’s nit druff aa wie guet ain isch

Dr Dosé het dr Rainer kisst

Dr Ospel sait i ha nyt gwisst

Nur dr Moritz maint verdeggel

I bi nid e so ne Seggel

Saits und nimmt galant sy Huet:

Adiee zämme -  machet s guet