Zeedel 2012

Fasnacht 2012

Mir schalte eifach ab

Isch es e Fluech oder isch es e Sääge?

Hit kenne z lääbe kunnt jeedem glääge

E jeede isch sich gwohnt dä Komfort

An jeedem Egge und jeedem Ort.


E haissi Duschi frieh am Morge

Druffaabe e Kaffi geege jeedi Art Soorge

Schnäll d Noochrichte gloost zem sich informiere

Me will schliesslig kenne mitdiskutiere.


Jetzt wird s aber Zyt – dr Schlissel schnabbe

No schnäll uff e Kopf die warmi Kabbe

S isch grussig kalt – das haisst „Haizig uff siibe“

Nai das isch wirgglig nit iberdriibe

Ab ins Auto und dr Sitz uffhaize

D Kelti duet scho d Schlyymhüt raize.

De freusch Di dr ganz Daag uff d Fyyroobeglogge

Denn kasch ganz entspannt in „Whirlpool“ hogge

und wenn s Di vor Kelti fascht duet butze

Kasch alternativ au d Sauna nutze


Im Summer kasch au komfortabel lääbe

Hesch e Klima-Aalaag und drnääbe

E Swimmingpool zem Di erfrische

E Apparat zem feini Cocktail mische

Au s Yyswürfel-Gräät darf nit fääle

Wär s esoo wurd s aim schamb aar quääle.


Fir alles und jeedes git s e Maschiine

Wo funggzioniert – s lauft wie uff Schiine

Das Lääbe in dr hittige Zyt

Aber wir lang no, iir liebe Lyt?

Sin d Energie unerschepflig?

Oder git’s e Knall - ganz fescht und bletzlig?


Isch es e Fluech oder isch es e Sääge?

Mir schalte ab – das kunnt uns glääge.


E kalti Duschi s Bescht geege friere  

Duet dr Kraislauf so richtig stimuliere

Und bringt e jeede schnäll in d Gäng

De fyylsch Di frei und ohni Zwäng


Uff dr Kaffi kasch verzichte

E Glas Wasser duet s au richte.

Und denne haisst s dr Schlissel schnabbe

No schnäll uff e Kopf die warmi Kabbe

Ab uff s Velo und denn loos

Isch das Lääbe nit grandioos

De fyylsch Di guet und voogelfrey

Vom Autoradio kunnt kai Gschrey

Das isch e Ufftaggt - und drbyy

Kennt das doch immer eso syy.


Dehaim im kalte Kämmerli

D Finger styff wie Glämmerli

Ziehsch dr e Pulli iber d’Ohre

Esoo bisch nit nach 3 Stund verfroore

Dr Färnsee blybt dunggel, s Radio stumm

E Buech wird glääse, vom andre wirdsch dumm


Dr Summer kunnt und d Fraid isch gross

Me nutzt dr Garte – es isch famoos

Wenn s haiss wird, hoggsch ganz aifach in Schadde

Und glopfsch e Jass mit em Nochber, däm gladde

Dä Summer isch abartig haiss

Und vo dr Stiirne fliesst dr Schwaiss

Jeedi Beweegig isch Aaschträngig puur

Und mit dr Zyt bisch numme no suur


Dr Wegger lyttet – es isch Zyt

De ryybsch dr d Auge – de gseesch no nyt

Und bletzlig wird Dir alles glaar

E Draum isch s gsi – wie wunderbar.


Aber Halt – was het dä Draum welle zaige

Miesst me sich nit danggbar drvoor vernaige

die Energye mit Sorgfalt nutze z kenne

wär das nit glaubt sell wyterpenne.