Iber d Schindgrabe-Clique

Im Joor 1945/46 isch es gsi wo e Hampfle vo Wasserfaarer d Idee gha het e Wage-Glygge z grinde. Es isch denne nit numme bi dr Idee bliibe und im Joor 1946 isch d Schindgrabe-Glygge s erscht Mool dr Cortège gfaare.

Wohär kunnt aigentlig dr Naame Schindgrabe? D Wasserfaarer hän iir Lokal am Klingedaal-Grabe gha. Dä Grabe het me in frienere Joor au Schindgrabe gnennt, well d Resser mit de Gieter und Ware, nodäm me d Waidlig entlaade het, sich dä Graabe uffe hän miesse schinde.

Es isch Tradizion in dr Schindgrabe-Glygge, dass mir alles sälber aafertige dien. No dr Sujetsitzig im Sebdämber dräffe mir uns ab em Oggdoober jeede Samschtig im Glygge-Käller an dr Metzerstroos. Deert wärde d Wänd gmoolt, Larve kaschiert, Goschdym gschnyderet und was nadyyrlig ganz wichtig isch – vyyl glacht. Es sell jo au Fraid mache, fir d Glygge deerfe z schaffe! An däre Stell wänn mir ussdrigglig bedoone, dass mir uff d Hilf vo e baar flyssige Hälferinne kenne zelle, wo mir nit misse mechte.

Usserhalb vo dr stränge Zyt zwische Oggdoober bis zer Fasnacht pflääge mir s Glyyge-Lääbe, indäm mir uns ab und zue im Käller zuemene gmietlige Oobe dräffe und aimool im Monet (jeede erschte Zyschdig im Monet) leen mir uns bim Franz im Stärnefäld in Blätzbums kulinarisch verweene. Zuedäm hän mir dr Glygge-Bummel zämme mit unsere Passivmitgliider im Aprille.

Drotz dääre vyyle Arbet und däm riisige Uffwand wo mir fir zwai Cortège-Noomidaag bedryybe, mechte mir uff gar kai Fall druff verzichte. Wenn mir uns zer Vernissage dräffe zem zämme uff dr Waage aastoose oder am Mändig in Cortège yyfaare, wisse mir: dr Uffwand het sich aimool meer gloont.


Liebi Hompage Bsuecher. Noch dääre kuuze Zämmefassig möchte mir im Noochgang e glaini Doggumäntazion in Bild und Schrift über die erschte 20 Joor vo de Schindgrabe noochfolge loo.

Doku:


Es hett mi  gfrait ass de yynegluegt hesch.

Wenn’s Dir gfalle hett und Du noo meer vo dr Schingrabe Fasnachtsgschicht wottsch kenne, so giib e Fitbag an Hompge-Master.

Tschau zämme